الحياة في الخيمة

شهادة أبو سامح، وهو نازح يعيش مع عائلته في مركز ايواء بغزة ويعمل كسائق شاحنة.

"اكثر من 1000 يوم مدفونين واحنا صاحيين

غزة قبر اسمه خيمة

القبر النايلون

3 متر في 4 متر. 12 بني آدم مرميين فوق بعض زي الغنم في الشوال،

النايلون رقيق مقطع، الهوا بفوت من الف فتحة، لا باب بيسكر ولا حيط بيستر،
اكثر من 1000 يوم واحنا بنتقلب في نفس القبر،
الصيف فرن 45 درجة، بتتنفس نار بتحرق صدرك، العرق بينزل من جسمك وبيلزق بجلدك وريحة الخنقة بتذبح،
الشتا ثلاجة مفتوحة، المي بتنقط من السقف نقطة نقطة، على عينك، على وجه ابنك، طول الليل وانت مش قادر تتحرك.

فرشتنا قبر ثاني

ما في تخت، ما في فرشة، بتنام على رمل بارد، على طين معجون بزفت، على حجار بتفوت بعظمك،

وضهرك مكسور، ركبتك بترج، رقبتك بتموت،
لو شتت الدنيا بتصحى تلاقي المي طالعة من تحتك، وحراماتك غرقانة، وابنك نايم في بركة مي،
وبالليل الفيران بتطلع من الزبالة، بتمشي على وجهك، والصراصير والبراغيث بتنام معك وبتشرب دمك ودم ولادك.

البرد بيذبح فينا،

شهر 1 و 2 برا 8 درجات، جوا بتحسها صفر،

والولاد بترتجف شفايفهم وبتزرق وجسمهم تلج،
الام بتقلع حرامها وبتغطي ولادها، وبتنام مجمدة، وبتحضنهم بجسمها طول الليل عشان ما يموتوا بين ايديها،
الكحة بتقطع الصدر، التهاب رئوي، التهاب قصبات، سخونية ما بتنزل، وما في حبة اكمول، بنموت قدام بعض، ومش طالع بايدنا شي.

الحر بيخنقنا خنق،

شهر 7 و 8 الشمس بتذوِّب النايلون من الساعة 7 الصبح،
الخيمة بتصير ساونا جهنم، النفس بينقطع، ريحة العرق والعفن بتخنقك،
والشايب بيوقع وبيغمى عليه، والرضيع بشرب مي وبستفرغها من الحر،

ما في مروحة، ما في كهربا، ما في نقطة هوا. الحل الوحيد تطلع تنحرق بالشمس برا.

كرامتنا انذبحت،

أب عمره 40، وأم، وشب طول بعرض، وبنت عمرها 16، وولاد صغار كلهم، نايمين لازقين ببعض،
بدك تغير بنطلونك انفضحت، بدك تستر حالك ما في مكان،
بدك تبكي لحالك، المخيم كله بيسمعك، اي كلمة بينك وبين مرتك كل الخيام بتسمعها،
بطَّلنا بني آدمين، صرنا لحم مرمي فوق بعض،

بنتعفن واحنا عايشين،

والمي بتنزل، والغسيل ما بينشف، وريحة العفونة لازقة بجلدنا وبأواعينا،
الجرب نهش جسمنا، القمل عشش براس ولادنا، الدمامل والالتهابات بتاكل فينا،
الولد بيصحى الصبح جسمه كله دم من كتر القرص والحك، وبيضل ساكت عشان ما يوجع أمه بعياطه،
بنحك جلدنا لحد ما نجيب الدم، وما في صابونة، ما في دوا، ما في حدا سائل فينا،
مش بس راح البيت، راحت النومة, راحت الكرامة، راحت الانسانية،
اكثر من 1000 ليلة، واحنا بنشحد ساعتين نوم بدون نقطة مي على وجهنا، بدون برد يهز عضمنا، بدون حر يخنق روحنا، بدون ذل يذبحنا.

احنا مش ارقام على الشاشة
احنا اكثر من 1000 يوم عذاب وقهر وذل وموت بطيء
الله المستعان ...".