أنا في صف مصر اللي انحش وسطها في غزة

أنا في صف الحرب
ع طول الدرب
المسكون بوجع القضية.

أنا في صف الحرب
وفي عرض
مين عنده خشا
قبل الشجاعة
وعارف
إن اللحظة الملعونة
لا بد لها من حلول ثورية.

أنا بالعن الإدانة
وفي صف العنتريات
اللي ليس صحيحاً
إنها لم تقتل ذبابة
وإن عنتر نفسه
ما قعدشْ ع الدكة
ولا وقف فِ نُص السكة
ولا باسم الاستراتيجية
والمواءمات الدولية
شق صف الجماعة.

أنا تحت رجل العيال
وفي صف النجاة
وفي صف المقاومة
وعمري ما أشوفهم أضدادْ
لكن قربت أتعَمِي
من شدة وهج الخيانة
والخيبة الرنانة
وزبانية المساومة
وزباين الصهيونية.

أنا ف صف كل صاروخ
جاي من قلب مشروخ
بيضرب في "جدار الخوف"
ويحيي ولو بالموت
الراية الفلسطينية.

انا هنا في مصر
أنا خارج الصف
أنا زي كل شعبي
واقف كما العبيط
واقف في وسط الميتم
مستني أمه تناديه
رغم أن الخشبة
مرت قدام عينه
وهو في دنيا تانية.

أنا في صف مصر
اللي انحش وسطها في غزة
وغزة فيها قلبي
وقلب كل عبد
بيبكي
ع سلاحه اللي اليوم
مش في إيدْها
أنا بيتي هو بيتها
وكلنا تحت الركام.

لذا وبكل تأكيد
انا في صف
حظر الطيران
وفي صف مسيرة عالمية
تزحف ع الأقدام.

أنا في عرض السلام
اللي عمره ما ييجي ب المُطاطية
لشوية أمريكان
أنا بنت هذا الهوان
وانت ابن هذا الكرب.

إحنا في قلب الحرب
وكل اللي في إيْدْنا
تَلقّي الضرب!!
ما عشنا ولا كنا
ولا فضلت بلادنا لنا
يا عرب
ولا يفضل في الذكرى عنا
غير مذلّة الأيام.

أنا ضد كل نظام
يرفض إنه يخوض الآن
حرب التحرير العربية
أنا في صف اللي جاي
ولو ما فضلش مني
تحت التراب
إلا شوية عظام
وكرامة غير مرئية.