الموقف المصري
- من شوية أُعلن اعتقال عدد من أنصار وأقارب النائب السابق أحمد الطنطاوي في كفر الشيخ، من بينهم عمه محمد نجيب الطنطاوي وخاله محمد سيد أحمد، وظهورهم، في نيابة أمن الدولة في القاهرة الجديدة، وفقًا للناشط الحقوقي والصحفي حسام بهجت.
- المحامي خالد علي، قال كذلك إنه النيابة بدأت التحقيق مع عم وخال النائب السابق، وحوالي عشرة من دائرته الانتخابية، وكلهم على ذمة التحقيقات في القضية رقم ٢٣٩١ لسنة ٢٠٢١ حصر أمن دولة بتهمة الانضمام لجماعة.
الحوار الوطني.. وﻻدة متعسرة ومستقبل غامض
07-07-2022
- الطنطاوي كان أعلن في ٢٠ أبريل الماضي، نيته الترشح للانتخابات الرئاسية واتكلم عن ملامح أهدافه، وكذلك أعلن عن موعد رجوعه لمصر يوم ٦ مايو، وبالتالي واضح إنه اعتقال أقارب وأنصار الطنطاوي فيه رسالة تهديد قبل رجوعه بيومين.
- تهديد الناشطين والسياسيين بأهلهم بسبب عملهم السياسي السلمي والمشروع، انتهاك صريح، لأنه بجانب إنه ظلم لناس معملتش أي مخالفة للقانون، فهو كمان اعتداء على الحق في العمل السياسي السلمي ودا حق بيكفله القانون والدستور.
- صفحة الموقف المصري بتدين اعتقال أنصار وأقارب المرشح الرئاسي المحتمل أحمد الطنطاوي، وبتستنكره لأبعد حد، ضروري إطلاق سراحهم في أقرب وقت، وكذلك تكون عودة النائب السابق لبلده تكون آمنة.
- اللي بيحصل دا المفروض بعد يوم واحد من انطلاق الحوار الوطني اللي الرئيس صرح فيه إمبارح وقال: "اختلاف الرأي لا يفسد للوطن قضية".
- اعتقال أنصار وأقارب الطنطاوي بتضرب في أساس الحوار الوطني وممكن تاخده في سكة مقفولة تقضي على تحضيرات شهور، وبترجعنا لورا كتير وبتزود حالة الاحتقان والإضطراب، والبلد في أمس الحاجة للاستقرار والهدوء.
- بنتمنى الإفراج الفوري عن أنصار وأقارب السياسي أحمد الطنطاوي وكل المعتقلين، كذلك بنتمنى الحوار الوطني ميتحولش لمجرد شعارات رنانة بدون فعل، أو مؤتمرات الناس بتتكلم فيها بدون السماع لهم والاهتمام بآرائهم.
- دايمًا كان بيكون فيه كلام عن إنه مفيش بديل وإنه هو دا المتاح في انتخابات الرئاسة، ودا للأسف مش لأنه مفيش بديل، ناس كتير بقالها سنين بتحاول تطرح البديل وتعمل ما في وسعها لصالح بلدها، لكن بتتعرض للإبعاد والمضايقات والضغوط زي ما احنا شايفين.
- مجددًا كل التضامن مع النائب السابق أحمد الطنطاوي، ومع المتضررين من عائلته وداعميه من المواطنين المصريين، وبنتمنى الهجمة تقف عشان مصلحة البلد اللي فعلًا معاناتها أساسها الإجراءات اللي زي دي.
*****
بيان إثر حبس أقارب وأنصار المرشح الرئاسي المحتمل أحمد الطنطاوي
في "الموقف المصري" 05-05-2023 : https://bit.ly/44rj4wJ
