مالك عدلي كل معرفتي بيه إنه محامي جدع بيتشحطت ورا الشباب لما بيتقبض عليهم. بالنسبالي هو الشخصية غير الملموسة اللي بقرا آراءه في تويتات وبسمعها وهو بيبهدل الرؤوس الكبيرة في لقاءات التلفزيون وبعمله شير وريتويت علشان آرائه تمثلني وخلاص على كده. أوّل احتكاك لي مع مالك عدلي كان في 25 يناير 2016 لمّا لقيت فجأة كل الإعلاميين بيدبحوني وأغلبهم شايف إن أي حكم غير سجني هو جنون. في وقت كان كل صحابي وأي حدّ بيكتب عني بوست علشان يدعمني بيلاقوا سيل بأوسخ الشتايم لأهاليهم… وقتها مالك عدلي قرر يطلع في الفضائيات علشان يدافع عني أنا وأحمد مالك في وقت التلفزيون كله كان متفق على أننا لازم "نتربّى" ونتسجن. مش بس كده، مالك عدلي كان بيقولهم أنتم اللي المفروض تتحاسبوا على اللي بتعملوه متتشاطروش على عيال صغيرة.. مالك كان بيدافع عننا وهو بيقول: "أنا مش محامي الشباب ديه بس شرف ليا أكون أنا المحامي بتاعهم".. مالك عمل اللي أبويا معملهوش.. مالك هو عبارة عن ضهر ليا ولناس كتير بيبقوا في موقف ضعف والدولة بحالها بتسلخهم وهو اللي بيتصدّر لهم.. اعتقال مالك هو قطمة ضهر بمعنى الكلمة.. مالك مينفعش يتسجن علشان مش هينفع نحكي لعيالنا إن الشخص اللي دافع عننا باستماتة اتسجن وإحنا سيبناه لما رفض بيع أرض وطنه واتُهم بالخيانة.. والله يبقى عار علينا.
#الحرية_لمالك_عدلي
من صفحة Shady H. AbuZaid (عن فايسبوك)
