محدش فكّر هو ليه العسكري الغلبان بقى غلبان؟ العسكري ده يظهر عليه الضعف وسوء التغذية لأنه من أسرة فقيرة في بلد لا توفر أمناً غذائياً أو رعاية صحية كافية، ومكمّلش تعليمه أو لم يتعلم أصلاً لأنه في دولة لا توفر خدمات التعليم الكافية.
طيب هوا ليه العسكري الغلبان بيفضل غلبان؟.. لأن المجندين بيقضوا طول مدة "خدمتهم الوطنية"، ٣ سنين، من غير ما يتعلموا أي شيء مفيد، لا قراية وكتابة، ولا صنعة أو حرفة ممكن تفيدهم. وقد يجدون أنفسهم بيشتغلوا في مشاريع الجيش الاقتصادية، واقف على بنزينة أو محل مخبوزات أو قاعة أفراح، بدون ما ياخد مليم زياده على ملاليم مرتّبه. واللي حظه أسوأ ممكن يلقى نفسه خدام عند الضابط أو عند الهانم مراته، ومفيش أي جهة تحميه لو الضابط أهانه أو ضربه (...)
حاليا خبرة قطاع كبير من الشباب اللي دخلوا الجيش سلبية، والنتيجة الأساسية للتجنيد بالنسبة لهم هي كسر نفسية المجنَد، وتذكيره طول الوقت إنه مالوش تمن ولا كرامة، وإن الدولة والنظام أهم منه ومن حياته. العقلية دي لازم تتغير. لازم شبابنا يحس أن التجنيد خدمة مشرفة ومفيدة له زي ما هي مفيدة للوطن (...)
من صفحة الموقف المصري (عن فايسبوك)
