مصر توقع مع إسرائيل أكبر صفقة غاز في تاريخها : إن لم تستح فاصنع ما شئت

الموقف المصري
08-08-2025

- صباح اليوم، كشفت شركة نيوميد إنرجي، الشريك في حقل ليفياثان الإسرائيلي للغاز الطبيعي، عن اتفاق مصري إسرائيلي على تعديل الاتفاق السابق بين الطرفين اللي تم توقيعه في 2018، بزيادة كميات الغاز المستوردة من إسرائيل لمصر، ومد فترة الاتفاق إلى 2040.

- البيان الرسمي الصادر عن الشركة بيقول إن شركة أوشن إنرجي المصرية اتفقت على إضافة 4.6 تريليون قدم مكعب، وهو ما يعادل حوالي 130 مليار متر مكعب من الغاز، يدخلوا الاتفاق على مرحتلين، الأولى هتشمل استيراد مصر لحوالي 700 مليار قدم مكعب فور تنفيذ الاتفاق.

- الشركة الإسرائيلية قدرت حجم الاتفاق ده بما يوازي 35 مليار دولار، ووصفته بإنه أحد أكبر اتفاقات الغاز في التاريخ.

- الاتفاق ده بييجي في نفس اللحظة اللي السيد الرئيس لسه واصف فيها ما تقوم به إسرائيل في غزة بأنه إبادة جماعية ممنهجة.

- وقبل ما حد يقول أصل ده القطاع الخاص، والدولة ملهاش دعوة، فلازم نقول كفاية كذب، احنا عارفين كويس إن شركة أوشن إنرجي المملوكة لرجلي الأعمال علاء عرفة وخالد أبو بكر، هي شريك لشركة غاز الشرق التابعة للمخابرات العامة المصرية، وهما مستوردا الغاز الإسرائيلي تحت أعين الدولة بجميع أجهزتها.

**

المنظور الإنساني؟

-احنا مش هنقول القضية الفلسطينية والتزامنا ورؤيتنا الوطنية، احنا هنقول أدنى التزام بالأخلاق الإنسانية والقانون الدولي هل يسمح لك بإنك تعقد اتفاق ب 35 مليار دولار مع دولة بتمارس إبادة جماعية باعترافك، وعلى حدودك؟

- هل ده مش نوع من التمويل غير المباشر بمبلغ هائل، علشان نتخيل حجمه هنفكر نفسنا بإنه يساوي الاحتياطي النقدي المصري تقريبا أو يقترب منه؟ تمويل بيروح في الآخر لإبادة أشقائنا على حدودنا.

المنظور الوطني؟

- طيب من منظور الأمن القومي والدولة اللي الرئيس بيحبه والنظام لا يكف عن استخدامه، هل فيه منطق في الدنيا يقول إنك ترتهن لجارك المسلح العنيف اللي لا يتورع عن ارتكاب إبادة جماعية على حدودك، وبيهدد علنا بتهجير 2 مليون إنسان إلى أراضيك (دي تصريحات وأوراق سياسات حكومية رسمية إسرائيلية مش تقارير إخبارية)، هل المنطق إنك تروح تديله 35 مليار دولار، وتخليه المصدر الأساسي للطاقة بالنسبة لك؟

- هل ناسيين إن في مطلع هذا الصيف قررت إسرائيل من تلقاء نفسها وبأحادية خفض كميات الغاز الموردة لمصر، ما تسبب في أزمة صناعية عانت منها مصانع الأسمدة وغيرها وتسببت في خسائر اقتصادية ضخمة؟

المنظور التجاري؟

- بمنطق الأجوان اللي الرئيس استخدمه لوصف اتفاق الغاز بين مصر وإسرائيل في 2018، هل فعلا الاتفاق ده مكسب لنا؟ إحنا المفروض بنستغل إن مفيش أي منفذ آخر للغاز الإسرائيلي سوى من خلال مصر بسبب غياب البنية التحتية من الأنابيب ومحطات الإسالة اللي ممكن تساعد إسرائيل على نقل غازها.

- ده معناه إن الغاز الإسرائيلي ملوش ممر غير مصر، ولو مصر امتنعت فهتكون فيه خسائر ضخمة لإسرائيل على المدى القصير على الأقل لحد ما تجد بدائل، وممكن الأمر يقود عمليا لتوقف العمل في حقلي ليفياثان وتامار.
- ده معناه إن بالمنطق التجاري المفروض إننا نحظى بسعر أو معاملة تفضيلية، لكن الي احنا شايفينه من تقدير الصفقة إننا تقريبا هندفع نفس الأسعار العالمية!

المنظور الاستراتيجي؟

- طيب لو أنا هصرف 35 مليار دولار خلال السنوات اللي جاية علشان أجيب بيهم غاز من إسرائيل، مش المنطق والتخطيط الاستراتيجي السليم بيقول إن الأفضل هو استثمار نفس المبلغ ده لمضاعفة إنتاج مصر من الطاقة المتجددة زي الطاقة الشمسية.

- ده له مكاسب كتير مش بس من الناحية البيئية، ولكن كمان لأن ده مصدر مستدام، بمعنى إنك مش هتحتاج كل سنة توجه مليارات الدولارات لاستيراد الغاز والنفط من الخارج، لأن هيكون عندك طاقة متجددة ومحتاجة فقط استدامة وتوطين للتكنولوجيا.

***

- عار عليكم، عار إنساني، عار وطني، عار سياسي، أن تمولوا إبادة جماعية، وأن تمولوا إبادة جماعية تجري على حدودنا، وأن تمولوا إبادة جماعية تجري لشعب بيننا وبينه دم وليس فقط عيش وملح، وأن تمولوا عدوكم الذي يهينكم يوميا ويهددكم بالتهجير والاحتلال.

- هل المشكلة دلوقتي في الأصوات اللي بتزايد؟ هل الهدف هو مصر؟ أي مصر؟ هل مصر التي تمول عدوها ب 35 مليار دولار وترهن نفسها لإرادته السياسية المتطرفة؟