#لا_للمحاكمات_العسكرية_للمدنيين

محمد فوزي.. أصغر مني بـ6 سنين. امبارح ضابط بجرّة قلم صدّق على الحكم عليه بالإعدام هو واللي معاه.. أنا ما عرفش محمد بشكل شخصي، وما عرفش أي حاجة عن أفكاره وأراؤه ولا موقفه من الثورة أو غيرها. ولا يعنيني.. بس أنا أعرف إنه بيتحاكم عسكري وعارفة كويّس إن المحاكم العسكرية جوهرها الظلم، وإنّهم مش بيسعوا لمعرفة الحقيقة (...) وأعرف إن الضابط اللي عامل نفسه قاضي اللي حكم عليه، حكمه مبني على محضر تحرّيات واحد وعلى بني آدم واحد وهمي ـ أو حقيقي وماحدّش شافه ـ هو اللي رابط كل المتهمين ببعض في كلامه، واعترافات جاهزة أُجبروا عليها بعد فترات اختفاء وتعذيب، وأن ما فيش جريمة تمّ التحقيق فيها فعلاَ، لكن كلّ الأحكام سواء إعدام أو حبس أساسها أن المحكمة العسكرية أكيد أدرى بنوايا البني آدمين!!
كمان اللي أعرفه إنّ محمد اتحكم عليه بعقوبة لو اتنفّذت ما فيش رجوع عنها لو جالنا فرصة سلام وأمان حقيقيين في المستقبل وفتحنا كل ملفات المعتقلين والسجون والقضاء. كل دي أسباب كافية أن أي حدّ مهتم بعدالة حقيقية يرفض جريمة القتل العمد اللي المحكمة العسكرية هترتكبها بـ"اسم الشعب". الحياة لمحمد فوزي واللي معاه.. العدل لمحمد فوزي واللي معاه.. والحقيقة لنا كلنا
#لا_للمحاكمات_العسكرية_للمدنيين

من صفحة Mona Seif (فايسبوك)