أنا بفشل بشدّة إني أكتب عن صحابي المقربين اللي في السجن.. بس لؤي القهوجي حيقفل حساب عدد أيّامه بـ3 أرقام ويدخل في الأربعة.. النهارده (27-8-2016) اليوم الـ 999 لحبسة لؤي، صاحبنا الجدع اللي كان بيقف جنب كل صحابه.. اللي كان عنده طريقة في الكلام كدة أقرب للكوميديا السوداء.. اللي ما بيحيّدش عن الحق والمؤمن بالثورة.. لؤي اللي بيحب الفن والأدب والسينما.. مش بس صديق بس كمان هو رفيق الحبستين.. لؤي اتمسك في 2 كانون الاول/ ديسمبر 2013 من مظاهرة لخالد سعيد.. بالقضيه دي اتحكم عليه بسنتين وانا اتحكم عليا بـ6 شهور.. وطلعت بعد 4 وهو كمل لحد ما عفو ايلول/ سبتمبر جاه وطلع اللي معاه في القضية اللي هما عمر حاذق وإسلام حسنين وناصر ولكن هو ما شملهوش العفو (...) خلصت حكمي في القضيتين و هو لسه جوه.. أنا مش عارفة لما حيخرج حيشوف الدنيا ازّاي ولّا التغيرات إزاي. أنا كلّ اللي اعرفه بس إنّي بكتب الستاتوس دي علشان في صديق أنا حاسة بالتقصير تجاهه بشدة وأنه واحشني جداً (...) ألف يوم في السجن.. بس الواحد عنده أمل إنك تطلع قريب، والأمل عمره ما خذلني، والأمل سلاحنا اللي مش حتاخدوه مننا في مواجهة قمعكم و ظلمكم.
من صفحة Mahienour El-Massry (عن فايسبوك)
