مصر ما اتعرتش يا جماعة، اللي اتعرت ست مسيحية وليها اسم واسمها سعاد واللي اتعرى جسمها مش جسم مصر، اللي عرّوها أصلا شايفين انهم كده بيعاقبوا الرجالة المسيحيين ومش بيعاقبوا الست نفسها ﻷن جسم الست دي بالضرورة ملك الطايفة اللي هي تابعة ليها، فبلاش لما تيجوا تدافعوا عن حق الست دي تحرموها انتم كمان من ملكية جسمها وتأمموه لصالح مصر.
..ومش عارفة ليه الناس مستغربة من تقاعس المسؤولين وتواطئهم في موضوع سعاد ثابت الست المسيحية اللي من المنيا.. يعني فيما عدا الست ضحية الاعتداءات الجماعية أثناء احتفالات تنصيب السيسي واللي السيسي زارها واتحاكم اللي اعتدوا عليها، كل ضحايا الاعتداءات الجنسية الجماعية الباقين تقريباً ما وصلوش لأي نوع من العدالة، سواء محاكمة الجناة أو التعويض أو حتى اعتذار من الدولة أو من أي مسؤول عن اللي مروا بيه.
من صفحة Dalia Abd Elhameed (عن فايسبوك)
