يوم الأحد اللي فات تم نقل زوجة رجل الأعمال صفوان ثابت للعناية المركزة في أحد المستشفيات، وتم وضعها على أجهزة التنفس بعد تدهور حالتها الصحية.
- "مريم" بنت رجل الأعمال صفوان ثابت نشرت الأخبار دي على صفحتها الشخصية، وقالت إنه والدتها بتنتقل للعناية المركزة للمرة الثانية في 10 أيام، وإنه وضعها الصحي سيء خلال الـ 6 أسابيع اللي فاتت.
- تقدمت مريم بطلب جديد للنائب العام "حمادة الصاوي" بعد عدم تمكنها من مقابلته لشرح وضع والدتها الصحي المتدهور، للالتماس بالإفراج عن والدها وأخوها المحبوسين لأكتر من سنة "حبس احتياطي" على ذمة القضية رقم 865 لسنة 2020 أمن دولة عليا.
- صفوان ثابت رجل الأعمال هو مؤسس شركة "جهينة للألبان" ورئيس مجلس إدارتها السابق، واللي تم اعتقاله بتهمة "تمويل الإرهاب" بعد سلسلة من الإجراءات اللي اتوجهت ضد شركته بشكل متتالي للتنازل عن حصته في شركة "جهينة" بشكل ما لصالح الدولة وشريك إماراتي، وهنا فيه روايات كتير جدا مش عارفين إيه مدى دقتها، بس كلها بتصب في فرضية التضييق على الرجل لترك شركته بالعافية.
- الإجراءات دي يعرفها كتير من اللي شغالين في السوق المصري، من منع منتجات جهينة من النزول للسوق في فترة، ومنع خروج أي عربية تحمل منتجات جهينة، وصولًا لحبس صفوان ثابت وابنه في فبراير 2021 للضغط عليه للتنازل عن شركته.
- صفوان ثابت برغم سنه الكبير، وبرغم إنه شخص لا يمثل أي تهديد على أي حد لأنه ببساطة مش مشغول غير بإنتاج شركته ومصنعه اللي واخدين مكانة كبيرة في سوق منتجات الألبان في مصر لسنين طويلة، وبرغم من إنه لم يصطدم بنظام مبارك ولا الإخوان ولا النظام الحالي، بل وتبرع كمان لصندوق تحيا مصر في فترة من الفترات.
- لكن ده يبدو إنه مكانش كفاية إنه الراجل يشتغل بدون معوقات أو تخويف، وللأسف اتحبس عشان رافض يبيع ملكيته الخاصة اللي بناها من الصفر عشان ناس تانية تستفيد بوضع شركته في السوق وتقدر تحتكره بسهولة.
- صفوان ثابت رغم سنه الكبير جدًا بيعامل بشكل صعب جدًا داخل السجن هو وابنه، وتكررت الشكوى من سوء المعاملة وتعمد إيذائهم ومنعهم من التريض ومنعهم من الكتب والجرايد، وحبسهم انفرادي بشكل مستمر، للدرجة اللي دفعت السيدة "بهيرة الشناوي" زوجة صفوان ثابت للخروج في فيديو تترجى فيه الرئيس السيسي العفو عن زوجها ونجلها، واللي قالت عنه " إنه موجود في غرفة انفرادي في أشد سجن في مصر تحت الأرض وممنوع من رؤية الشمس".
- برغم المطالبات العديدة محليًا ودوليًا للإفراج عن صفوان ثابت لكن الحكومة والسلطات الأمنية في مصر رافضة الموضوع ده تمامًا رغم كل المعاناة غير الإنسانية اللي بيعاني منها صفوان ونجله.
- وللأسف حتى زوجته لم تسلم من التخويف والتهديد، وتم اعتقالها بعد الفيديو بتاعها اللي انتشر بشكل كبير، وأفرج عنها لاحقًا بكفالة لكن القضية مستمرة.
****
-اللي حصل مع صفوان ثابت بيفكرنا بأحداث متكررة مع رجال أعمال آخرين اتقبض عليهم وتم الافراج عنهم بدون تفسير واضح، أو لتصفية حسابات، وهنا هيبقى السؤال هو القانون والسجن بقى أداة لتصفية حسابات البيزنس؟
- الغريب زي ما قولنا إنه في شهر رمضان 2014 حضر صفوان ثابت مؤسس الشركة إفطار مع الرئيس السيسي، وبعدها تبرع ب50 مليون جنية لصندوق تحيا مصر واستمرت علاقته الجيدة وتبرعاته لصندوق تحيا مصر لحد أغسطس 2015.
-السؤال هنا هل واحد متهم بتمويل الإرهاب كان بيقعد مع الرئيس بيعمل إيه وبيدفع فلوس في صندوق تحيا مصر عادي كده؟
- في أغسطس 2015 قررت لجنة حصر وإدارة أموال جماعة الإخوان التحفظ علي أموال صفوان ثابت، بعد كده تم ضمه على قائمة الإرهاب في يناير 2017 ولمدة 3 سنوات، وده تزامن مع ضم أسماء من مختلف التيارات السياسية للقوائم دي بدون إدانتهم في أي قضية، وشفنا قصة رجل الاعمال عمر الشنيطي وإغلاق مكتبات ألف على سبيل المثال.
- لكن الغريب أنه لم يتم القبض على صفوان ثابت طول السنوات دي وفضل في شركته بشكل عادي لحد ديسمبر ٢٠٢٠، بل واتكرم من الجيش في ٢٠١٨.
- بعد شهرين من القبض على صفوان ثابت تم ضم ابنه سيف الرئيس التنفيذي للشركة للقضية والقبض عليه في أول فبراير، لكن على عكس صفوان اختفى تماما ومتعرضش على نيابة، ومظهرش إلا في 23 أبريل ٢٠٢١ !!
- الشركة عينت الشريك السعودي رجل الأعمال عبدالله الدغيم في منصب رئيس مجلس الإدارة مكان صفوان ثابت، وغالبا ده سبب عدم إمكانية الاستيلاء الكامل على الشركة وتعيين حارس قضائي، عشان كده تم اللجوء للتضييق بالطرق غير القانونية زي سحب رخص العربيات، لحد ما أسهم الشركة بدأت تنهار، وحاليا فيه شركة قطرية استحوذت على 5% من أسهم الشركة.
- مفيش حد ضد تطبيق القانون على الجميع، لكن ده لازم يكون بأدلة قوية وإجراءات سليمة، ومصداقية بعيدة عن الأسباب السياسية والاقتصادية.
- حتى لو صفوان ونجله متهمين بشيء ليه بيتم اضطهادهم والتضييق عليهم داخل السجن، هل دا جزء من العقاب والضغط، وخلاص تحولت مؤسسات الدولة لأدوات انتقام!
- يعني هل لائحة السجون بتتضمن كل الانتهاكات اللي أسرة صفوان ثابت بتتكلم عنها دي بدون حتى ما حد يكلف نفسه يحقق أو أي شيء؟
- ياريت نشوف قريبًا حد عاقل يتدخل للإفراج عن صفوان ونجله وإنهاء معاناة الأسرة دي، والتوقف عن الضغط والتخويف اللي بيتمارس ضده وضد كل رجال الأعمال اللي بيشتغلوا في مصر، عشان يجبرو على مشاركة أشخاص من ذوي النفوذ، واللي هو مستوى صعب من الفساد والسرقة بالإكراه، وده شيء بالإضافة لكونه انتهاك لحقوق الإنسان فهو واحد من أهم أسباب تخوفات أي مستثمر إنه يعمل شغل في بلد زي مصر بيحصل فيها الأمور دي.
