عرض غنائي واستعراضي

الحاجّة تجلــس أمــــام المذيع في الاســــتديو الفاخر.
ـــ الحاجّة: والله يا ابني، ابني مات من زمان في الثورة، قالولنا ابنك شهيد. واحنا فرحنا. قلنا اهو شهيد يعني احسن من الدنيا وما فيها. ـــ المذيع: ماكانش عندك غيره؟
ـــ الحاجة: لا يا ابني ازاي؟ دوكهة كان سيد. عندي كمان رضا وشيماء.
ـــ المذيع: ربنا يخليهملك.
ـــ الحاجة: تعيش يا ابني. رضا جم ومسكوه لما قالوا عليه اخوان. كدابين يا ابني والله. ماكانش اخوان ولا حاجة. احنا ناس نعرف ربنا وبنحب مصر. هو اللي مالوش خير ف بلده يبقى له خير ف حد؟ وبعدين بقينا عايشين على باب الله. الحاجّ متوفي بقاله زمان. ودلوقتي البت شيماء لو جالها عريس وإلا حاجة. طب مش الجوازة دي تلزمها مصاريف؟ فاحنا بنقول يعني لو الحكومة تساعدنا ف حاجة، اصلهم بيقعدوا يقولوا شباب الثورة، واحنا والله بنحب الثورة. سيد كان يقولي الثورة لو نجحت يا أمي كل حاجة هتبقى كويسة وهنلاقي نشتغل.
ـــ المذيع: شكرا يا حاجة على كلامك المؤثر.
ـــ الحاجة: تسلم يا حبيبي.
ـــ المذيع: ممكن تغنيلنا بقى؟
ـــ الحاجة: اغني ايه يا بني؟
ـــ المذيع: اي حاجة.
ـــ الحاجة مرتبكة: ماعرفش اغني يا بني.
ـــ المذيع: ليه يا أمي؟ ماهو حضرتك بتعرفي تتكلمي كويس أهو . انتي أثرتي في المشاهدين دلوقتي كلهم بكلامك دا، ازاي ما تعرفيش تغني؟
ـــ الحاجة: الواحد مقهور والله يا ابني.
ـــ المذيع: وماله يا أمي؟ غني حاجة حزينة.
ـــ الحاجة: والنبي يا ابني ما اعرف.
ـــ المذيع: طب بتعرفي تعملي إيه؟
ـــ الحاجة: باعرف أوكّل عيالي.
ـــ المذيع: طب قولي للمشاهدين على طريقة أكلة كدا. 
ـــ الحاجة: (صامتة)
ـــ المذيع: بس أكلة حزينة والنبي يا حاجة. المشاهدين بتاعنا دخلوا في موود حزين بعد كلامك.