كيف تسببت تصريحات مدبولي غير المسؤولة في خسارة البورصة المصرية 1.2 مليار دولار؟

- يوم الأربعاء الماضي، أطلق رئيس الوزراء الدكتور مصطفى مدبولي تصريحه المثير للجدل عن إمكانية تطبيق اقتصاد حرب في مصر حال تطور الصراع في المنطقة إلى حرب إقليمية.

- كتبنا تعليقا على تصريحات مدبولي بوست أوضحنا فيه إنه لا معنى لتطبيق اقتصاد حرب في بلد لا تحارب وإنما تقع في منطقة فيها حرب، وأضفنا إن سياسات حكومة مدبولي خلال السنوات الماضية أفضت إلى مؤشرات اقتصادية أسوأ ظاهريا من المؤشرات الي شهدتها مصر سنة 1970 بعد 3 سنوات من الحرب المستمرة المباشرة مع العدو الإسرائيلي.

- قلنا كمان إن تصريحات مدبولي بتتناقض مع اتجاه الحكومة الحالية لجذب الاستثمار الأجنبي المباشر لمصر، لأن أول عنصر يجب أن يتوفر لجذب الاستثمار هو عنصر الأمان بالمعنى الواسع، يعني اطمئنان المستثمر إن فلوسه وأعماله مش هتخضع لإجراءات طوارئ مفاجئة تأثر عليها.

- وقت ما كنا بنكتب كان كلامنا بيتجسد للأسف الشديد في خسائر سوقية تكبدتها البورصة المصرية خلال جلستي الخميس والأحد بقيمة سوقية وصلت إلى 1.2 مليار دولار.

- علشان بس نكون واضحين والناس تفهم كويس، الخسارة السوقية مش معناها إن فيه فلوس أو بنكنوت بيخرج بره مصر، وإنما إن السوق أو البورصة دي فيها مجموعة أسهم لشركات مختلفة، كل سهم له قيمة، فمجموع قيم الأسهم دي بيمثل رأس المال السوقي.

- لما بييجي تصريح غير مسئول زي تصريح مدبولي، أو حدث خطير زي مثلا اندلاع حرب، أو اضطراب اقتصادي مفاجئ، أسهم الشركات كلها بتنزل، لأن الناس بتكون قلقانة وعايزة تبيع الأسهم وتاخد فلوسها، وفي المقابل محدش بيكون عايز يشتري أوي، فبالتالي، رأس المال السوقي ده بينخفض، يعني مجموع أسعار الأسهم بينخفض، وده الي حصل والبورصة رأسمالها السوقي انخفض 1.2 مليار دولار.

- الخبير في الأسواق المالية محمد حسن، العضو المنتدب لشركة ألفا للاستثمارات المالية، صرح على خلفية الخسائر دي إن التراجع الحاد والخسائر السوقية دي جت بعد تصريحات رئيس الوزراء، وقال إن التصريح عن إمكانية تطبيق اقتصاد حرب زعزع ثقة المستثمرين في أداء الاقتصاد المصري.

- ده نموذج بسيط عن الأداء غير المخطط وغير المسئول للإدارة الحالية اللي بتقود مصر من سنوات، والي بتتسبب بأدائها ده في خسائر متتالية للاقتصاد المصري كان يمكن تجنبها بدرجة ما على الأقل.

- المشهد ده بيوضح لنا برده حقيقة مهمة جدا، وهي إن التصور الساذج اللي بتروجه مجموعات رقمية مختلفة على وسائل التواصل الاجتماعي عن إن الأمن القومي للبلد بيبدأ فقط عند الحدود، وإن ملناش دعوة احنا بالي بيحصل في المنطقة، هو تصور خطير، ومش عايزين نقول مدمر، شفنا تبعاته في ملف المياه، وبنشوفها حاليا في تراجع أداء قناة السويس بسبب الصراع في البحر الأحمر.

- احنا فعلا مقبلين على تهديد خطير لوضعنا الاقتصادي الهش وهو إمكانية توسع الصراع خاصة مع اقتراب الرد الإسرائيلي على إيران، وبنقول إن انتظار وصول الخطر للأراضي المصرية بعد ما يكون طال الاقتصاد والمصالح والأمن المائي والغذائي المصري ده اسمه عبث وتهديد خطير لمصر لا يمكن أن يقبل به أي مواطن مصري بيدعي أنه بيحب مصر أو مؤمن بالوطنية المصرية.