س: هي الشباب عند وزارة الداخلية ليه؟
ج: عشان غضبانة من القتل المجاني
س: أيوه يعني ناويين يعملوا ايه؟
ج: محدش عارف، هما نفسهم مش عارفين، هما عارفين الموت و الغضب بس
س: طيب ليه متقولهمش يروحوا التحرير؟
ج: عشان التحرير فشل يجيب حق اللي مات بدل المرة عشرة
س: طيب متقولولهم ... ؟
ج: أقولهم ايه بس، حد فيكم عنده حل بجد؟ أروح أضحك عليهم وإلا أقولهم كلام شعارات؟
س: أصل مش عايزين دم؟
ج: القاتل مش مستنيك تروحله عند وزارته، بيخطفنا من الشوارع ويقتلنا في ماتش كورة، تفرق في ايه بقى!
س: طيب هما عايزين ايه يعني؟
ج: عايزين عيش وحرية وعدالة اجتماعية وكرامة انسانية، عايزين حق الشهيد، عايزين يفهموا ليه عواجيز بتخطط لمستقبل وأطفال بتكتب وصيتها.
من المدونة المصرية منال وعلاء