تعرف أنك لو عندك بنت وعايز تختنها ممكن تروح سوق السيدة عائشة وتختنها بـ30 جنيه أو لو عايز تكرم الراجل بـ50!
يوم الجمعة اللي فات لاحظت طوابير في سوق السيدة عيشة، وأمّهات معاهم بناتهم الصغيرين. رحت سألت إيه ده، محدّش من الستات جاوبني لحد لما بياعة خضار قالتلي إن هنا في أوضة الختان.. أنا كنت قريت في اليوم السابع تحقيق عن حاجه شبه كده فروحت لواحد منهم في المكان اللي فيه الطابور ده وقلتله إن ليّا أختي وعايزين نختنها (مع العلم إني ماعنديش اخوات)، قاللي هاتهالي الأسبوع الجاي، ولما سألته عن التكلفة قاللي "عشانك هخلصهالك على 50 جنيه، إنما في العادي بنعملها بـ70"، ولما فاصلت معاه قاللي "هاتلي إنت العدّة ـ شاش وقطن وعلبة أمواس ـ وأنا عندي الباقي، بـ30"!
وقفت بعيد أراقب، لقيت أن اللي بيخش ما بياخدش أكتر من 5 دقائق ويطلعوا. والبنت بتكون كأنها مغمي عليها من كتر العياط.. ولما كلمت كذا حد من الستات فضلوا يقولولي إن الختان عفّة ومن الدين وبيخلّي البنت محترمة وحاجات عجيبة كده! أنا كنت بقول فئة قليلة اللي بتعمل كده، بس للأسف بعد ما سألت كتير عرفت أن الموضوع ده بيحصل بالهبل، بس من تحت لتحت، بعد ما كنّا فاكرين أن المجتمع ارتقى. كفاكم إهانة بقى للجنس ده بجدّ!
من صفحة Mohamed Gamal Eldin (عن فايسبوك)