أنا مش معنّفة ولا هربانة.. علاقتي كويسة مع أهلي، ويمكن دي أكتر حاجة مدّياني دعم نفسي في الفترة دي. ليه استقليت؟! لأني ببساطة اكتشفت أننا في مصر ما تربيناش ولا اتعوّدنا غير على التبعية، التبعية في كلّ شيء: في الشكل، في الفكر، في المستقبل، وفي أسلوب الحياة نفسه.. ما تربيناش عالاستقلال، وما عرفناش يعني إيه قرار ويعني إيه أكون أنا صانعة القرار والمسؤولة عن نتائجه.
لقيت نفسي خلصت الجامعة وكمّلت الـ21 سنة واتقبلت في الجامعة الأمريكية، فقلت ده أنسب وقت إنى أستقلّ.. والاستقلال بالنسبة لي فكري قبل ما يكون مادي.. محتاجة اكتشف نفسي أكتر وأتعرف عليها وده عمره ما هيحصل طول ما أنا جوّه منطقتي الدافية مع أهلى وأصحابي ومعارفي.. محتاجة أطلع برّه كلّ ده عشان أعرف نفسي. معرّضة للفشل أكيد، بس لو جينا للحق أنا ما نجحتش في حياتي غير لما اعترفت إني فشلت، فالفشل بالنسبة لي ظاهرة صحية جدا بتخليني أعيد ترتيب أفكاري وأوراقي زي الـpuzzle كده.
(إسراء عطية، 21 سنة، الاسماعيلية)
من صفحة Femi-Hub (عن فايسبوك)