- فريق وأعضاء صفحة الموقف المصري بيقدموا خالص التعازي لأسر كل الشهداء اللي ماتوا وهما بيأدوا واجبهم بحماية أرض الوطن، والعزاء لمصر كلها، لكل المصريين.
- بشكل واضح نرفض التوظيف السياسي لأي أحداث مشابهة، كما نرفض أن يكون الموقف السياسي من النظام الحالي داعي لتأييد أو تبرير أو التهاون مع الإرهاب .. لو اتحكمنا من داعش أو ما يشبهها محدش هينجو من القتل والدمار، لا مؤيد ولا معارض.
لكن طرح الأسئلة والرقابة الشعبية في الكوارث ده موقف وطني بحت، وبيحصل في العالم كله:
- "مصادر أمنية" قالت لموقع مصراوي والوطن وغيرهم إن الاتصال انقطع بالقوات عشان مفيش شبكة هناك!! وكلام برضه عن إن الطيارات كانت بتدور على المدرعات ومش قادرة تلاقيها!!
مفروض فيه اجراءات بسيطة جداً بنشوفها عند القوات المدربة في كل مكان في العالم:
- فين هواتف الثريا اللي بتشتغل بالأقمار الصناعية؟! ليه مش موجود واحد منها مع طاقم كل مدرعة على الأقل إن مكانش مع كل ظابط؟
- فين طائرات الاستطلاع اللي تسبق القوات اللي داخلة الصحرا لكشف الطريق؟
- بلاش دي، فين طائرات الدرون الصغيرة، اللي بتستخدمها القنوات في تصوير الحالة المرورية من فوق؟ ايه صعوبة ان الحملة يكون معاها الدرونز دي بتكشف المكان، وفي نفس الوقت بتوضح موقعهم واللي بيحصل لقيادتهم؟ وسعرها رخيص جداً بالمناسبة.
- فين نظام تحديد الملاحة المُشفر في كل مدرعة وعربية؟ المفروض إنه من بديهيات الجيوش والأجهزة الأمنية بالعالم؟ طيب بلاش ده، فين أبسط حاجة نظام جي بي إس عادي؟
- هل فيه أي حد هيتحاسب على الأخطاء اللي تسببت بقتل كل العدد الرهيب ده؟ بلاش نقول محاسبة سياسية بتزعل ناس، طيب محاسبة مهنية بحتة؟ وزير الداخلية المسؤول المباشر عن الحملة اللي أكيد خرجت بأمره؟ طيب حتى محاسبة المشرف المباشر على العملية؟
اقرأ أيضاً: عن الدولة البوليسية والنخب والسيطرة على الحكم في مصر
- بقالنا حوالي 24 ساعة ملايين المصريين بياخدوا الأخبار من إعلام خارجي، أو من "مصادر أمنية" مجهولة عمالة تصرح للمواقع، بينقلوا كل المعلومات من أول أعداد الضحايا وحتى آخر تطورات الاشتباك، بينما البيان الرسمي الوحيد صدر مساء امبارح بعد ساعات ومقالش أي حاجة خااااالص أكتر من انه "سقوط عدد من الشهداء والمصابين".
يعني خلاص بيتم حجب المواقع المستقلة، والتضييق على الصحفيين المعارضين، بس حتى الصحافة اللي عايزة تنقل المعلومة الرسمية فقط متلاقيش؟!!
- فين باقي أركان المواجهة غير الأمنية؟ في العالم كله فيه جانب أمني يخص الإرهاب اللحظي الحالي، اللي رافع سلاح عليك، وفيه جانب اجتماعي وفكري وثقافي واقتصادي وسياسي يخص مسببات التحول للتطرف Radisalization .. ده بيشتغله متخصصين وأكاديمين، وده مش تبرير بل بالعكس، ده اللي فعلاً بيوفر أثمان أغلى بكتير.
***
- بنسأل ومن حقنا السؤال، لأن تكرار الخطأ بيقول إن فيه مشكلة ولازم نشوف لها حل.
- بنسأل ومن حقنا السؤال، لأن الموضوع يخصنا بشكل مباشر، كل المصريين بلا استثناء، يخصنا لأن اللي ماتوا مننا مش من شعب تاني، ولأن الإرهاب بيهددنا كلنا، ولأن أداء الأجهزة الأمنية بمختلف عناصره يؤثر علينا كلنا، ولأن دي أموال دافعي الضرائب.
- بنسأل ومن حقنا السؤال لأن ده وفائنا لدماء كل اللي ماتوا في الواحات وفي سيناء وفي غيرها، مش الصمت بل الإيجابية، ومش التطبيل الأعمى لكن العقل والمراجعة.
عن صفحة الموقف المصري على فايسبوك