قفشتوا ليه؟ انا بهزّر. ده أنا حتى مفقعتش عين متظاهر ولا سحلت بنت في الشارع وعريتها..
في وقت صغير بقيت محبوب من أغلب الناس علشان كنت بقدم تقارير في برنامج تلفزيوني ساخر، بس برضه كانت الناس بتشتمني بحجة اني بفضح صورتنا قدام العالم الخارجي..
شاركت في ثورة يناير زي ما كتير من المصريين شاركوا. وعمري ما هاندم على مشاركتي فيها. الحقيقة إني بعتبر نفسي محظوظ إني شاهد على أغلب أحداث الثورة من أولها لآخرها. شفت كتير زي ما كتير شافوا.. شفت سحل وقتل في عز الظهر من قبل "رجال" الأمن، وبشكل شخصي تمت ممارسة بعض الانتهاكات معايا في أحداث الثورة من الـ3 فصائل اللي حكموا من بعد الموجة الأولى من الثورة.
عشت في حالة اكتئاب طويلة وسط عجز تام وعدالة مالهاش وجود.. وأخيراً، اتمنعنا حتى من إبداء رأينا: ممنوع تعمل مظاهرة وتعبر فيها عن رأيك والا هتتسجن. أغلب الأصدقاء بطلوا الكلام في السياسة وبيحاولوا يتناسوا الثورة، لكن الحقيقة إنهم مش ناسيين ومش هينسوا ومش هيعرفوا. كله ساكت، كله خايف، وانا أكترهم. في ذكرى 25 يناير 2016 بقى في تواجد أمني رهيب في الشوارع مع تهديدات لمن ينزل يتظاهر... محدش فعلا نزل. طيب خلاص.. انتو فعلا معاكم سلاح ومعاكم السلطة والقانون، بس كل أسلحتكم دي هنعمل منها نكت، كوميكس أو فيديو، وكدة كدة انتو تقدروا تخطفونا من بيوتنا وتقتلونا في عز الظهر، بس مش هتقدروا تنكروا وجودنا ولا هتقدروا تنكروا إنكم نكتة، بس نكتة سخيفة.
من صفحة Shady H. AbuZaid (عن فايسبوك)