الصورة المنتشرة دي مش طقوس سُفلية ولا حاجة، دي مراسم افتتاح مركز "اعتدال" العالمي لمكافحة التطرف!
أيوه والله دا مركز بجد، له وجود "فيزيائي"، تم افتتاحه في الرياض إمبارح، واسمه "اعتدال"!
لما قريت نظرية عمل المركز دا حسيت إنه تقريبا حد سمع "السيسي يكلف الهيئة الهندسية للقوات المسلحة بتجديد الخطاب الديني" وقرر يعمل كدا بجد، بس على مستوى العالم!
مركز "اعتدال" كما جاء في وصفه بيقوم بالآتي:
"يطور المركز تقنيات مبتكرة يمكنها رصد ومعالجة وتحليل الخطاب المتطرف بدقة عالية، وجميع مراحل معالجة البيانات وتحليلها يتم بشكل سريع لا تتجاوز 6 ثوان فقط من لحظة توفر البيانات أو التعليقات على الإنترنت، بما يتيح مستويات غير مسبوقة في مكافحة الأنشطة المتطرفة في الفضاء الرقمي"
يعني إيه الكلام دا؟
يعني الخطاب المتطرف آخره ست ثواني من أول ما يخرج من كيبورد المتطرف لغاية ما السينسور بتاع "اعتدال" يلقطه وينور أحمر وأصفر!
حد يقولي طب افرض المتطرفين كانوا واعيين وبيستخدموا سيم ما بينهم محدش يعرفه غيرهم؟
هقولك شوف الحتة دي كده:
"ويعمل المركز بمختلف اللغات واللهجات الأكثر استخداماً لدى المتطرفين"
يعني من النهارده شغل التحوير بتاع المتطرفين مش هياكل مع "اعتدال" والناس اللي بتتكلم لغات عجيبة زي "سغة لمبة" بتاعة أحمد مكي هيتعرفوا وهيتجابوا
أنا عارف إنه مش جديد إنه نعرف إننا متراقبين، بس المرة دي إحنا مش متراقبين من أي حد، دي "اعتدال" بنفسها، يعني ممكن واحد صاحبك النهارده معاك، بكرة "اعتدال" تاخده وماتعرفلوش طريق بسبب كومنت ع الفيسبوك "اعتدال" شافت إنه بيغذي خطاب التطرف!
"اعتدال" واضح من ظروف نشأتها وافتتاحها الأسطوري إنها لا ترحم، فنخلي بالنا يا جماعة عشان دي خيام أحمد جودة سوسن ودول هالم عارضة بلاد وأدي نسخة واضحة!
اللهم بلغتكوا اللهم خلوا بالكو
من صفحة محمد خميس عن الفيسبوك (مصر)