أنا بحترم كل أصحابي القريبين الشغالين في الشغل المدني مع المحافظ، وفعلاً معنديش موقف من حوار أطول مائدة إفطار في العالم، بس مش حينفع حاجة زي دي تعدِّي عليا من غير ما أفتكر أن الفن ميدان اتمنع بشكل أمني من سنتين لأنه تجمعات خطرة، ومش حعرف ما أفتكرش معتقلي السجون اللي اتقبض عليهم وهم بيتسحروا واتحكم عليهم بـ15 سنة، ومش حعرف أنسى صحابي المعتقلين اللي بيفطروا في السجن لأنهم بيتحاكموا بقوانين تظاهر وتجمهر وإرهاب.
آه صحيح، إحنا بنتحاكم عشان اتجمعنا أكتر من 6 و7 وعطّلنا المرور وكده، والسنة اللي فاتت في فطار اسكندراني ميفرقش حاجة عن تجمع النهارده ضباط امن الدولة بعتوا مخبرينهم يفضوا الفطار وأخدوا مننا الأكل. وصحيح برضه اعملوا اللي انتوا عاوزينه بس لو سمحتم بلاش استفزاز، إحنا مستفزين جداً من الشو اللي معمول ده. الحقيقة انه على الجانب الآخر من اسكندرية مفيش أكل ومفيش مياه والناس بتعوم في الزبالة، وحتى لو فكرنا ننزل نتجمع حيتقبض علينا.
حرام عليكم ارحمونا بقى ولو المحافظ فعلا بيفكر بشكل مختلف حد يقوله إن الناس عاوزة تلاقي خدمات بجد، شويّة نضافة وشوية أكل وشرب نضاف، حيفرقوا معاهم أكتر بكتير من مائدة بيتفرجوا عليها من بعيد وخايفين يشاركوا فيها.
من صفحة RANWA MOHAMED YOUSSEF ALI على فايسبوك