من بداية اليوم والعاصمة كانت بتحتفل بماتش الزمالك، وأتوبيسات جماهير الزمالك من كل المحافظات. الأجواء كانت سعيدة وحماسية جداً.. وكان فيه أطفال كتير، وكذا ست حامل، وكان فيه كذا شاب متواجد بكرسي بعجل.. الفرحة كانت كبيرة ومكنش فيه أعلى من صوت الأغاني.
العدد كان حوالي 10 آلاف، ما بين جوا الممر وبراه، والممر عرضه 6 متر وطوله 50 متراً، وكان زحمة جداً، ومكنش فيه أي سبب يخلي الناس تقلق من الزحمة، عشان مكنش فيه حد ناوي على حاجة من الجماهير، ومكنش فيه أي توقع لأي غدر من الداخلية ـــ الاستاد ده المفروض منشأة عسكرية واللي بيأمنه جيش طول الوقت، وخلال الـ4 ساعات محدش شاف عسكري جيش زي العادة ـــ الناس فضلت تغني عشان تدخل، بعدين الداخلية قررت تدخل الجماهير من خلال قفص حديدي في سابقة جديدة على مدرجات مصر. بدون سابق إنذار، الداخلية ضربت قنبلتين، الناس وقفت تستفهم ده فض والا تهويش زي آخر كام مرة.. في الوقت ده الغاز زاد جداً وبدأ الخرطوش، الضرب كان ع الناس اللي في القفص والممر، فالناس بدأت ترجع، محاولات الجري كانت مستحيلة، والناس بتحاول تتفادى تدوس على بعض، واللي كان بيقدر يشيل حد كان بيشيله، بس اللي حصل كان حصل في ثواني.
عن صفحة أحمد البحر Ahmed El Bahar على فايسبوك
https://www.facebook.com/ahmed.e.bahar/posts/10152833101949475?pnref=story