أعتقد أن المقصود من كل ده (قضية محاكمة الكاتب أحمد ناجي بسبب فصل من روايته) أن نكتب إقرار إننا بنتكلم فصحى زي أفلام الأنيمشين الياباني المدبلجة، ومابنعملش سكس جوه الجواز أو براه، بس العيال بتيجي لو مسك إيدها جامد، وإن السكس حاجة ما بتحصلش، وإن ماعندناش أعضاء تناسلية، ومابنقولش غير الكلمات المهذبة، وماحدش فينا ملحد أو مِثلي ولو ظهروا هيطلعوا في صور مخبيين عنيهم، أو مكسورين عشان هما مش حقيقيين، ومش موجودين في الكتاب، وبنصلي خمس مرات، ومافيش مسيحيين ومافيش بهائيين وبنحاول نحرقهم وننكر وجودهم وما نسلمش عليهم وما ناكلش من أكلهم، ومش هيعملوا كنايس أو نكتبهم "بدون" في البطاقة عشان الصورة الأساسية تطلع صح زي ما اتخيلناها.
وما فيش تعذيب، وما فيش اختفاء قسري، ما فيش إخوان، ما فيش نيابة وشرطة مش فاسدين أو أغبيا، ما فيش كتب غير سلاح التلميذ، وما فيش ناس ما بتحبش الكورة أو مش أهلاوية، وإن قناة السويس أبهرت العالم، وإن العالم دمر السياحة، وإن السياحة فينا بس ربنا هادينا،..وأي حد هيشد الغطا أو يقول إن فيه ناس لا تلتزم بالمواصفات القياسية للكائن المصري الفرعوني الشامخ والإسلامي الدامغ وابن العسكر القارح وإننا مش موجودين أصلاً.
من صفحة Ahmad El Fakharany (فايسبوك)