الاعتقال رحمة عن كدا.. الأهل بيكونوا عارفين هوا فين وقادرين يشوفوه ويتطمنوا عليه ويوصّلوله أكل وغيار وأدوية! إسراء مش معتقلة، إسراء مخطوفة، طول الـ12 يوم اللي بنعدّهم كان عشان نعرف هي فين ؟
مش من حقنا نعرف هي فين عشان يبقا من حقنا نعرف هي كويسة ولا لأ؟ بتاكل؟ بتشرب؟ هندخللها الدوا إمتى؟ بتنام؟ الوقت دا بيعدّي عليها ازاي؟ لوحدها؟ نفسيتها عاملة ايه؟ أكيد محتاجه تغير هدومها. خدوها ليه وناويين على ايه؟ وقاعدين 12 يوم يجهزولها أي قضية ويلفقولها أيّ تهم؟ هي في ايد مين؟ هنعرف مكانها امتى؟ ايه الي حصللها؟ أذوها؟ وهتفضل عندهم قد ايه؟ واصلا ليه خدوها ؟ عملت ايه؟ هوا مش الدستور بينصّ أنه "يجب أن يُبلغ فوراً كل من تقيّد حريته بأسباب ذلك، ويحاط بحقوقه كتابة، ويُمكٌن من الاتصال بذويه وبمحاميه فوراً، وأن يُقدّم إلى سلطة التحقيق خلال أربع وعشرين ساعة من وقت تقييد حريته"؟
نشتكي لمين تاني؟ يا رب دا المافيا أهون من كدا.. بيتصلوا ويطلبوا اللي يطلبوه وبيرجعوا اللي خاطفينه..
إسراء، بعد ما فقدت قدرتها على الحركة كانت بتعيّط وبتقوللنا مصر حلوة. مصر اللي مدتهاش أي حاجة وخدت منها كل الحاجات اللي بتحبها وخدت اصحابها.. كانت بتقولنا عليها حلوة ومش عايزة تسيبها... هي أكيد عرفت غلطها خلاص، يا رب خرجلنا إسراء وكلنا هنمشي والله.. ومش هنيجي تاني!
من صفحة آلاء الطويل (أخت اسراء) على فايسبوك