مش فاكر كنت بتكلم مع مين.. عن التعليم المدرسي وقولتله إن فيه ناس خريجي "سكولز" زيَّك وناس خريجي مدارس زي حالاتي .. وان السكولز مش شرط اعني بيها بيئات تعليم اجنبي بل ممكن تكون حكومية.. فى حين ان ما اسميه انا من باب السخرية "مدارس" ما هي الا معسكرات اعتقال يومية لأبناء وبنات هذا البلد. بمناسبة "المدارس"، اسرَّ لي سوّاق العربية اللي بتوصلني ان عنده مشكلة وهو ان اسلام ابنه كان نازل يتوضى في فسحة المدرسة عشان يصلي الصبح، قامت الدادة حدفت عليه وعلى اتنين زمايله كانوا فى الحمام أكياس كلور مركز. ربنا سترها مع اسلام والكيس جه فى ضهره وهدومه، لكن زمايله الاتنين كانوا سيئي الحظ والأكياس جت فى وشهم، فواحد عينه راحت والتاني كان على وشك مع حروقات.. وأضاف ان دي دادة مجنونة لان كل ما في الأمر ان حد من العيال الصبح حدفها من شباك الفصل بكيس بول فقررت تنتقم.. طبعاً فيه واحد خريج "سكول" ممكن يسألني طب هي عرفت تحدف ازاي من شباك الحمام بالدقة دي.. ساعتها حقوله يا ميدو دي حمامات دور ارضي وملهاش سقف. الست الشريرة جابولها البوليس.. والمناوشة البسيطة بتعبر عن الخط العام لطريق الصراع فى يوميات "مدارس" القاهرة .
من صفحة Mohamed Naeem على فايسبوك