اود أن أعلن أولاً عن احترامي لكل صاحب وجهة نظر*
- أعزائي محبي السيسي والمؤمنين به، عندي ليكم اعتراف: أنا بحسدكم فشخ. نفسي أعرف الشعور اللي انتم بتمروا بيه ده مرة في حياتي.
- نفسي يبقي عندي ايمانكم الأعمى وتفاؤلكم المدهش بأي حدّ، زي ماكنت باحسد الشباب "البرادعاوي" كده.
بس أنا للأسف من الناس التانية الوحشة ديه اللي مبتاكلش من الكلام العايم أو خطاب النوايا الحسنة اللي السيسي وصباحي مش فالحين غير فيه، ومن الناس اللي شايفة ان الأول خاين عشان ترشح، والتاني زيه برضه عشان ترشح.
- معلش يا جماعة, بس أنا مش قادر اؤمن براجل عاوز يترشح خطابه كله شقا و تعب و تقشف و بس.
راجل مش بيوعد بأي حاجة و في رأيه اننا كتير وانانيين لرغبتنا في الحياة ومش بندي كفاية لمصر عشان مش بنصحي الصبح بدري و مش بنمشي للشغل ولازم جيلين مننا يتفشخ (جيلين يعني 60 سِنة علي فكرة) عشان "مصر تعيش".
راجل مش واعي اصلا لفكرة ان:
1- فلوس الحكومة ديه فلوسنا فهو مش بيمن علينا بحاجة
2- ان قبل ماييجي يكلمنا في أي حاجة يلم سوء الادارة والفساد الأسطوري اللي كلنا شايفينه وشغال لحد دلوقتي في فلوسنا, واللي السبب إن احنا وصلنا للحال ده كشعب
- ان التقشف اللي مفروض يتفرض اصلا هو تقشف الحكومة, يعني قبل ماتعمل علي فيلم قطع الدعم مشي نص الناس اللي في الحكومة اللي مش بيعملوا أي حاجة عشان هم مش من بقية اهلنا، عشان نصرف عليهم واحنا اللي نتفشخ. ستة مليون موظف ومفيش حاجة ماشية صح؟ ولا حاجة؟
وجي يشخط في العيال في الفيديو ويقولهم "لأ مش ممكن"؟ وبعدين هو بيتكلم في جيلين ليه؟ هو ناوي يقعد قد إيه كده؟
- معلش، أنا مش شايف في الراجل ده أي نوع من أي فكر يقدر يطلعنا من اللي احنا فيه، زي ما أنا مشفتش منه أي ابداع في محاولته في القضاء علي الإخوان فعليا أو فكرياً.
أنا مش شايف غير خطاب عاطفي وكلام له نفس مصداقية جهاز الكفته بتاع دكتور العلم الكوني. مش قادر أشوف غير صراع ودم لا ينتهي, وكم مشاكل مرعب محتاج ناس فعلا تعرف تحلّه عشان ماحدش بقي قادر يستحمل تجارب.
- أنا شايف إنسان احساسه بذاته أقوى من ذكائه وقدراته, والدليل على كده انه اترشح اصلاً، ونفسي أعرف اسطورة دهائه و انجازاته الخارقة ديه جت منين.
السيسي من ساعة ما استقال لا عمل مؤتمرات و لا حتي لقاءات اعلامية، الخوف منا سجنة وبعد كده نلاقي عبيدة يقولوا شعبية جارفة!!
- آنا مش حقدر ائتمن علي أمني مع حد فعلاً، مش حيعرف يعمل مؤتمر واحد في الشارع في أي محافظة عشان مش حيقدر يأمن نفسه أصلا.
- أنا مش حاقدر اثق في التوجه الاقتصادي لانسان شايف المشكلة ممكن تتحل لو الناس اللي مشيت من مصر تبرّعت بشهر من مرتبها للبلد كأنهم مش بيبعتوا فلوس، أو كأن مصر مستشفى 57 ولو كلّنا اتبرعنا بجنيه كله حيبقي تمام. ده هبل وملوش أي معني.
- أنا بحسدكم. أساسي العالم اللي انتم عايشين فيه عالم هايل، واحنا فيه قوة عظمة وكل مشاكلنا سببها مؤامرات ومخططات خارجية وشوية عملاء ومنظمات حقوق إنسان شريرة. هنا الأجهزة الأمنية مش عارفة تعمل معاهم حاجة، مع ان الاعلام الله ينور عارفهم واحد واحد وبيسجلهم كمان.
- عالم جميل لقيتوا فيه الزعيم والمخلّص اللي حيخلص علي كل الناس الشريرة اللي رأيها مختلف عن رأيكم، وكله تمام لو الراجل قعد 8 سنين وجاب وزير الدفاع الحالي بعديه رئيس تمانية كمان.
- هم يعني الإخوان لما كانوا بيقولوا تمن سنين مرسي وتمن سنين أبو اسماعيل كانوا أحسن منكم في إيه؟
-أنا اتمني لكم كل خير, بس فعلا نفسي أعرف بتعرفوا تعملوا كده إزاي؟ اتمنى انكم تقدروا تساعدوني, عشان الراجل ده مش داخل مخي.
- مش عيب إنك تكون مخطئ .. العيب إنك تحاول تبرر أخطاء من تؤيدهم !
- عن مؤيدي السيسي أتحدث.
تحياتي للمخدوعين