عن قضية "أبوتريكة" والقانون والقضاء..

النهارده كل المواقع العربية والعالمية ناشرة خبر ضم أبوتريكة لقائمة الإرهابيين، وكل التعليقات بكل لغات الدنيا مستغربة جداً أو للأسف بتسخر مننا، وبيشبهو مصر بكوريا الشمالية..  زي ما قلنا سابقاً دايماً فيه جانب سياسي جنب الجانب التقني..
2017-01-23

شارك
لاعب الفوتبول المصري محمد أبو تريكة

1- هتحلوا الأزمة الاقتصادية ازّاي؟!

النهارده كل المواقع العربية والعالمية ناشرة خبر ضم أبوتريكة لقائمة الإرهابيين، وكل التعليقات بكل لغات الدنيا مستغربة جداً أو للأسف بتسخر مننا، وبيشبهو مصر بكوريا الشمالية!!
لما تكون الخطة الرئيسية للدولة هي جذب السياحة والاستثمار، وعلى أساسها حصلت كل القرارات الاقتصادية زي تعويم الجنيه والديون الضخمة، ازاي ده يحصل؟ 
 -  زي ما قلنا سابقاً دايماً فيه جانب سياسي جنب الجانب التقني، وجانب رئيسي في حل الأزمة الاقتصادية هو الأوضاع السياسية والقانونية في الدولة، ده مش كلام نظري ولا رأي، دي واحدة من مؤشرات ترتيب الدول في تصنيف جذب الاستثمار عالمياً.
 - أبوتريكة زي أي مواطن يخضع للقانون ويتعاقب لو غلط، وده محترم في العالم كله، لكن لمّا كل ده يحصل بدون أي دليل أو حتى حكم قضائي ضده، وهو لسه الأسبوع اللي فات الفيفا كرمته بدعوته لحضور تتويج رونالدو، ويوم السبت اللي فات "الكاف" كرمته بحضور افتتاح كأس الأمم، وقعد جنب الرئيس الجابوني، ومن قبلها هوا حامل لقب أفضل لاعب في أفريقيا 4 مرات، وضمن أفضل لاعبي كأس العالم للأندية بتصنيف الفيفا ..الخ الخ .. المستثمر اللي يشوف أن ده حصل مع أبوتريكة بشهرته وأهميته ممكن يخاف إن أمواله أو أموال شريكه المصري تتجمد فجأة بلا سند
- يا ترى كام مستثمر وكام سايح غيّر رأيه من القدوم لمصر بسبب الخبر ده؟ خسرنا كام مليون وجايز كام مليار دولار؟

*****

2-  إيه هوّ تعريف الإرهابي؟
- الإرهابي اللي نعرفه هوّ حد زي الملاعين اللي بيقتلوا اخواتنا في سيناء، أو مثلاً اللي فجر الكنيسة البطرسية.. لكن هل ينفع تقول "إرهابي" على المواطن اللي مختلف سياسياً مهما كان رأيه مادام مرفعش سلاح؟؟ طيب هل ينفع تتقال على مواطن ملوش أي آراء سياسية معروفة زي أبوتريكة؟ إحنا بقالنا سنين مسمعناش ولا كلمة سياسية من أبوتريكة في أي حوار أو على صفحته أو بأي شكل.
-
لما يتم توسيع الكلمة جداً بالشكل ده النتيجة هي أنها بتفقد جدواها، النتيجة إن الإرهابيين الحقيقيين بيتوهوا وسط زحمة الموصوفين ظلماً بالكلمة دي.. ده في حدّ ذاته بيعطل مكافحة الإرهاب.

*****

 

3-  إزاي الشعب يثق في البيانات الرسمية؟
- إذا كان ده حصل مع أبوتريكة، بكل شهرته وعلاقاته، يبقى بأبسط منطق نفكر إيه اللي يضمن أن باقي القايمة كلها من 1513 اسم، منهم 94 سيدة، كلهم كلهم مفيهومش مظلوم؟!
- القايمة مليانة أسماء مشهورة بعيدة زي رجل الأعمال صفوان ثابت صاحب شركة جهينة، ده غير كل الأسامي الي محدش يعرفها اطلاقا، وكمان تشمل أسماء 6 متوفين، واتنين أقباط!
-
إذا كان ده بيحصل مع حاجة بأهمية قوائم الإرهاب إيه اللي يضمن إن أي بيانات رسمية تكون دقيقة وصادقة؟! إيه اللي يضمن العدالة لأي مواطن عادي؟ الظلم واحد سواء كان ضحيته أبوتريكة المشهور أو أي مواطن.

*****

 

4-  ليه القانون يتفصّل مخصوص للهرب من القضاء؟
تعالو نعرف القصة من البداية
- الوضع الطبيعي هوا إن المتهم بيتحاكم، وعلى أساس الأدلة القاضي يحكم، وبناء عليه ممكن يتصنف إرهابي، فيتطبق عليه الأحكام اللي منها تجميد أمواله، منعه من السفر، منع تجديد جواز سفره، الحرمان من الحقوق السياسية..الخ. ومن حق الشخص انه يطعن ضد الحكم أو القرار
 - اللي حصل إن "لجنة التحفظ على أموال الإخوان" كانت بتقرر بدون أحكام قضائية ولا غيره، ورئيسها قال انها تستند إلى "تحريات الأمن الوطني"، لكن القضاء صحح المسار، وصدر في فبراير 2016 من مجلس الدولة حكم بأنها لجنة ادارية غير قضائية ومش من حقها الإجراءات دي، وصدرت في حالات كتير أحكام ببطلان التحفظ زي ما حصل مع أبوتريكة.
 - محمد أبوتريكة حصل على حكم من القضاء الإداري في 21 يونيو 2016 برفع التحفظ على أمواله، ولكن لجنة أموال الإخوان منفذتش الحكم! فأبوتريكة رفع قضية تانية لتنفيذ الحكم وحصل على حكم تاني برفع التحفظ في 10 يناير الجاري.
 -  لو احنا في "دولة" محترمة يبقى تلتزم بأحكامها القضائية، وكان مفروض أبوتريكة يطلع من القصة دي من زمان بأحكام المحاكم.
-
اللي حصل أنه واضح إنهم لقوا القضاء الإداري ومجلس الدولة بيبوظ شغلهم في التحفظ على الشركات والأموال، عافية كده، فلجأوا لتطبيق قانون الكيانات الإرهابية، القانون 8 لسنة 2015.
-  أكيد محدش يعارض محاربة الإرهاب وتشديد عقوبات الإرهابيين، لكن القانون ده مليان تفاصيل عجيبة وضد العدالة والمنطق، منها إنه بينصّ على تشكيل دائرة خاصة بمحكمة استئناف القاهرة، والنيابة تبعت لها قائمة الاشخاص والكيانات اللي ينطبق عليها وصف "كيانات ارهابية" فتتضاف إلى قوائم الإرهاب خلال 7 أيام ويتطبق عليهم الاجراءات.. بس كده!.. لا فيه دفاع ولا محاكمة، ولا شرط يكون الشخص عليه قضية أساسا! ولا حتى بيبلغوا الشخص إن ده حصل ولا أي حاجة. فجأة يصحى الصبح يشوف اسمه في القائمة، مبروك إنت بقيت ارهابي وملكش فلوس ولا سفر ولا انتخابات، وبرضه ممكن لا تتحاكم ولا يجرالك أي حاجة!
والوضع ده يستمر 3 سنوات ثم يُجدد أو يُلغى، أو الحل الوحيد هو الطعن أمام محكمة النقض، وده اللي هيعمله أبوتريكة، لكن ده بياخد اجراءات طويلة جداً.
-
إحنا لنا ملاحظات على المنظومة القضائية، وعشان نتمنى "دولة" بنطالب بإصلاح القضاء وبنشاور على الخلل، بينما من يمثل "الدولة" هوا اللي بيفصل قانون عشان يتهرب من الاجراءات القضائية الطبيعية! القانون العجيب ده صدر بقرار جمهوري من رئيس الجمهورية قبل تشكيل مجلس النواب، وبدون ما أي حد يعرف أي حاجة عنه، والبرلمان أقره ضمن مئات القوانين اللي للأسف بنقول أنه بصم عليها في أول دور انعقاد لأنه مكانش فيه وقت حد يقرا ويناقش مئات القوانين

*****

بعيداً عن كل التحليل والكلام الكبير، إحنا في فريق صفحة الموقف المصري بنتضامن كل التضامن مع أبوتريكة، اللاعب المحترم صاحب الخير والأخلاق، اللي لا فجّر ولا قتل، ولا حتى مارس السياسة اللي تخليه خصم معارض.. بعد كل أزمة أبو تريكه بيخرج بشعبية ومحبّة أكبر من الناس، وغصب على اللي ظلموه وظلموا مواطنين كتير غيره.

دولة العدل والكفاءة هتيجي بإيدنا كلنا مهما طال الوقت.. همتكم معانا..

#تحيا_مصر_بالعدل
#أبو_تريكة
#دردش_مع_العيلة

من صفحة "الموقف المصري" (عن فايسبوك)

 

 


وسوم: العدد 226

مقالات من مصر

كيف جرى تكبيل مصر واستعبادها؟

رباب عزام 2024-03-21

يبدو أن السلطة المصرية لن تتوقف نيتها في بيع الأصول والأراضي، ولن تكتفي فقط بما حُسم من صفقات منذ العام 2021، بل ستسعى إلى مزيد من عمليات البيع، تنفيذاً لاشتراطات...

السيسي وثمن دماء الفلسطينيين

حسام خليفة 2024-02-26

تضاعف الدين المصري، في السنوات الخمس الأولى من عهد "نظام يوليو 2013"، أكثر من خمسة أضعاف بحسب وزير المالية المصري آنذاك، عمرو الجارحي. بينما ارتفع إجمالي الدين الخارجي المصري إلى...